Պաուլ Ցելան | Paul Celan

(1920-1970թթ. Ռումինիա)

*

Դու կարող ես ինձ անխռով

ձյուն հյուրասիրել.

ամեն անգամ, երբ ես ուս ուսի տված

թթենու հետ մեկտեղ քայլում էի

ամռան միջով,

բղավում էր նրա ամենամատղաշ

տերևը:

*

Նախքան քո ուշ հայացքը,

միայնակ`

գիշերների միջև,

նաև ինձ փոխակերպող գիշերվա,

ինչ-որ բան եկավ կանգնելու,

ինչը եղել էր արդեն մեզ մոտ մի անգամ, չ-

զարնված մտքից:

ՁԵՌՔ

Սեղանը, ժամերի փայտից,
բրնձով ու գինիով:
Անդ
լռում են, ուտում են, խմում:

Մի ձեռք, որ ես համբուրեցի,

լուսավորում է շուրթերը:

ՀԵՌՎԻ ԳՈՎՔԸ

Ակունքներում քո աչքերի
խենթ ծովի ձկների ցանցերն են ապրում:
Ակունքներում քո աչքերի

Պաուլ Ցելանը Ժիզելի ու Կլաուս Դեմուսի
հետ: 1953թ. գարուն

ծովն իր խոստումներն է պահում:

Այստեղ նետում եմ
մի սիրտ,   որ մարդկանց մեջ է,
հագուստը իմ և փայլը երդման.

ավելի սև սևի մեջ, ես ավելի մերկ եմ:
Դավաճանելով եմ քեզ հավատարիմ:
Ես` դու եմ, երբ ես ինքս եմ:

Ակունքներում քո աչքերի
հալածում եմ և կողոպուտի մասին երազում:

Ցանցը ցանց է որսացել.
մենք հեռանում ենք գիրկընդխառն:

Ակունքներում քո աչքերի
մի կախվող խեղդում է պարանը:

ԾԱՂԻԿ

Քարը:

Քարը օդի մեջ, իսկ թիկունքում` ես:

Քո աչքը` կույր, ինչպես քար:

Մենք

ձեռքեր էինք,

մենք խավարը դատարկեցինք, մենք գտանք

խոսքը, որ ամռան վրա բարձրացավ`

Պաուլ Ցելանը կնոջ՝ Ժիզել Ցելանի հետ

ծաղիկը:

Ծաղիկը կույր խոսք է:

Քո աչքը և իմ աչքը.

նրանք հոգ են տանում

ջրի մասին:

Աճը,

Սրտի թերթ է սրտի թերթին

հավելում:

Եվս մի խոսք, ինչպես դա, և մուրճերն են

ճոճվում բաց երկնքի տակ:

ԵԳԻՊՏՈՍՈՒՄ

Դու պետք է օտարականի աչքերին նայելով ասես` Ջուրը եղի՛ր:

Դու պետք է, ինչը դու ջրում գիտես, օտարականի աչքերում փնտրես:

Դու պետք է նրանց ջրերից կանչես` Հռութ, Նոեմի, Մարիամ:

Դու պետք է զարդարես նրանց, երբ պառկած ես օտարականի հետ:

Դու պետք է զարդարես նրանց օտարականի ամպ-վարսերով:

Դու պետք է ասես Հռութին, Մարիամին ու Նոեմին.

Տեսե՛ք, ես նրա հետ եմ պառկած:

Դու պետք է գեղեցկագույնս զարդարես օտարականին, ում հետ պառկում ես:

Դու պետք է զարդարես նրան քո ցավով` Հռութի, Մարիամի և Նոեմիի մասին:

Դու պետք է ասես օտարականին`

Տե՛ս, ես նրանց հետ պառկել եմ:

ֆրանսերենից թարգմանեց ԹՈՆԴՐԱԿԸ

Պաուլ Ցելանը Նանիի ու Կլաուս Դեմուսի հետ, Լոնդոն, 1955թ. մարտ