«Ընտրությունները աշխարհի լավագույն թատրոնն են»

Թեմա: Ընտրություններ

Որքանո՞վ են գրողները հետաքրքրվում նախընտրական թոհուբոհով, եւ արդյո՞ք այն գտնում է արձագանք  իրենց ստեղծագործությունների մեջ:

Այս եւ այլ հարցերին պատասխանում է երիտասարդ գրող Հասմիկ Սիմոնյանը:

  Հասմիկ Սիմոնյանը   բանաստեղծությունների   երկու ժողովածուների հեղինակ է`  «Լուսնոտ բառեր»  և   «Թափթված սենյակներ» :  Արժանացել է մի շարք մրցանակների, այդ թվում`  Հայաստանի Հանրապետության  նախագահի երիտասարդական մրցանակի  «գրականություն» բնագավառում(2006թ.):

-Ոքանո՞վ ես հետաքրքրված նախընտրական ընթացքով:

 - Ակտիվորեն հետևում եմ: Ընտրությունները աշխարհի լավագույն թատրոնն են, որտեղ դերասանները ոչ միայն խաղում են, երգում, պարում, արտասանում պաթետիկ և ոչ այնքան, սիրո կոչեր անում, կուրծք պատռում` ցույց տալու` ում սիրտն է ավելի մեծ և հետևաբար ավելի շատ ցավում, այլև վերջում ծաղիկներ են նվիրում հանդիսատեսին, տարատեսակ քաղցրավենիք ու գումար:

Այսօր, օրինակ, իմացա, որ յասամաններ են նվիրել իմ ընկերներից մեկին, նվիրողը ջահել աղջնակ էր, նվիրվողը` տարիքով տղամարդ: Հրաշալի է:

Ափսոս, որ ընտրությունները սրանով չեն սահմանափակվում և հինգ տարի շարունակ հանդիսատեսը վճարելու է, քերթելու է իր սեփական կաշին, որ փոխհատուցի:

Սովորաբար, երբ կաշին, ոսկորները, միսը վերջանում են, ու մնում է արյունը, սկսվում են նոր ընտրություններ:

-Ընտրությունները որքանո՞վ են արձագանք գտնում գրական ստեղծագործության մեջ:

Ընտրությունները ընթացիկ կյանքի մի մասն են, ու ինչպես որ գրվում են ստեղծագործություններ սիրո մասին, դավաճանության, այնպես էլ նվիրվում են տողեր ընտրություններին: 

-Քո ստեղծագործություններում կա՞ն դրսևորումներ:

Իհարկե, կան: Մի շարք եմ սկսել, որի վերնագիրը չեմ ասի, մշակեմ, վերջացնեմ, կհրապարակեմ:
Վերջ ի վերջո, ընտրությունը տոն է, որը հինգ տարին մեկ մեզ հետ է: Ինչո՞ւ անտեսել:

Արփինե Արզումանյան

mynews.am
ապրիլ 29, 2012թ.